Enis Veliu Në seancën e Kuvendit të Komunës së Zubin Potokut sot mandatin e morën tre këshilltarë të Iniciativës Qytetare për Zubin Potokun dhe njëri prej tyre, Slavisha Bishevac, u emërua kryetar i parlamentit lokal.
Kuvendi Komunal i Zubin Potokut me tre prej tyre, përfshirë edhe kryetarin, tani ka gjithsej 19 këshilltarë – 16 shqiptarë dhe tre serbë.
Ai shpjegoi se thelbi i ngjarjes së sotme është mbrojtja e interesave të qytetarëve dhe pengimi i përfaqësuesve shqiptarë që të marrin vendime me rëndësi jetike në emër të shumicës së popullatës serbe.
“Sikur të mos ishim sot në këtë kuvend të jashtëzakonshëm, mandatet tona do t’u jepeshin edhe shqiptarëve”, tha Bishevac, duke thënë se ata vendosën ta ndërmarrin atë hap edhe sepse, siç thotë ai, kanë parë që anëtarët e Listës Serbe nuk kanë reaguar për faktin se “shqiptarët marrin Kuvendin”.
“Kështu ata treguan qartë se në njëfarë mënyre donin t’ua dorëzonin pushtetin legjislativ në Zubin Potok. Ata heshtën më parë edhe pse e dinin se një bazë po ndërtohej në Donji Jasenovik dhe pasojat e kësaj janë të gjera”, tha Bishevac.
Ndonëse sapo kanë marrë mandatet e tyre, nga Nisma Qytetare për Zubin Potok thonë se “me gjasë” do të bojkotojnë punimet e Kuvendit, deri në përmirësimin e gjendjes në terren apo deri në formimin e Asociacionit të Komunave Serbe.
Pasi serbët nga veriu u larguan nga institucionet e Kosovës, përfshirë kuvendet lokale, në fund të nëntorit të vitit të kaluar, pozitat e këshilltarëve mbetën vakante në katër komuna.
Përveç anëtarëve të Listës Serbe, nga Kuvendi Komunal i Zubin Potokut u largua edhe e vetmja këshilltare opozitare në atë kohë, Milija Bishevac.
Komisioni Qendror i Zgjedhjeve më pas shpalli zgjedhjet për Zveçanin dhe Leposaviqin për shkak se nuk kishte këshilltarë që të zëvendësonin ata që u tërhoqën, ndërsa nuk ishte rasti në Zubin Potok dhe Mitrovicë e Veriut, ku me sistemin automatik, pjesëmarrësve në zgjedhjet e mëparshme iu dha mundësia për të mbushur vendet e lira.
