Fatmir Limaj është politikani kosovar që përgjatë dy dekadave të fundit ka kaluar nëpër shumë procese gjyqësore vendëse dhe ndërkombëtare, por asnjëherë deri më tani nuk është shpallur fajtor.

Ish-komandanti i UÇK-së dhe ish-zv/kryeministri i Kosovës është gjykuar për krime lufte nga Gjykata e Hagës dhe nga gjykatat kosovare, si dhe për korrupsion nga Misioni i Bashkimit Evropian për Sundim të Rendit dhe Ligjit (EULEX), por në të gjitha këto procese gjyqësore është shpallur i pafajshëm.

Limaj ka qenë një nga themeluesit e Partisë Demokratike të Kosovës (PDK), me besimin e së cilës në vitin 2008 u zgjodh ministër i Transportit dhe Postë Telekomunikacionit (MTPT). Kjo ministri u bë sinonim i rastit ku Limaj dhe disa të tjerë akuzoheshin nën dyshimet për keqpërdorime në disa tenderë për mirëmbajtjen e rrugëve në rajonin e Gjilanit.

Në një proces të paprecedent juridik që zgjati rreth 2700 ditë, ku aktakuza mori trajta të ndryshme nga “MTPT 1” në “MTPT 2”, e pastaj në aktakuzën e konsoliduar, u dëgjuan dhjetëra dëshmitarë, u ndërruan disa prokurorë e gjyqtarë, por prokuroria nuk arriti që me provat e ofruara dhe të administruara në gjykatë të vërtetojë se Limaj dhe të akuzuarit e tjerë kishin kryer krim të organizuar lidhur me veprën e keqpërdorimit të detyrës zyrtare si vepër kryesore e kësaj aktakuze.

Krahas këtyre proceseve gjyqësore nga të cilat Limaj doli i pafajshëm, ndryshime drastike pësoi edhe karriera e tij politike.

Limaj u largua nga Partia Demokratike të Kosovës dhe bashkë me Jakup Krasniqin dhe të tjerë politikanë, krijoj Nismën për Kosovë, e cila sot më vonë u shndërrua në partinë që sot thirret Nisma  Socialdemokrate.

Për disa vjet, kjo parti ishte pjesë e Kuvendit të Kosovës, mirëpo që nga fillimi udhëheq me vetëm një Komunë në Kosovë- atë të Malishevës, prej nga vjen edhe vetë Limaj.

Pozitën më të lartë në shtetin e Kosovës, Limaj e ka ushtruar gjatë viteve 2017-2019, kur ka qenë zëvendëskryeministër në Qeverinë e drejtuar nga Ramush Haradinaj.

Patundshmëritë

820.000 € është vlera e përgjithshme e pasurisë së patundshme të deklaruar nga Fatmir Limaj në vitin 2019, ku përfshihet një banesë- si trashëgimi familjare në vlerë prej 70 mijë euro; një shtëpi banimi në vlerë prej 250 mijë euro- po ashtu trashëgimi familjare; dhe 13 hektarë tokë bujqësore në vlerë prej 500 mijë euro.

Një deklarim të ngjashëm të pasurisë së patundshme, Limaj e ka deklaruar prej vitit 2010, kur ka qenë ministër i Transportit, e këndej.

Gjatë një hulumtimi disamujor, Instituti për Hulumtime “Front” ka zbuluar të gjitha patundshmëritë që i disponon ish-zv/kryeministri Limaj. Sipas këtyre dokumenteve ekskluzive, Limaj ka në emër të tij një shtëpi në vendlindjen e tij në Banjë të Malishevës me një sipërfaqe prej rreth 200 metrash katror, e cila nga shteti vlerësohet rreth 30 mijë euro dhe rreth 26 mijë metra katror në emër të tij- tokë, parcelë pyjore dhe parcelë për shtëpi familjare, vlera e së cilës është llogaritur mbi 150 mijë euro.

Të hyrat

42.087 € kanë qenë të hyrat vjetore të Fatmir Limajt dhe bashkëshortes së tij në vitin 2019. Kur ishte zv/kryeministër Limaj kishte të hyrat më të larta, në krahasim me vitin 2011, kur ishte deputet i Kuvendit të Kosovës dhe kishte deklaruar të hyra vjetore prej më pak se 9000 €.

Paratë Cash

6474 € para të gatshme ka deklaruar Limaj në vitin 2019, derisa më së shumti para cash kishte deklaruar në vitin 2010 kur ishte ministër i Transportit, përkatësisht 26.230 €.

Kreditë

Nga viti 2010 deri në vitin 2019, Limaj vazhdimisht ka deklaruar se e ka marrë një kredi 10-vjeçare në vlerë prej 40 mijë euro.

Vetura

Në vitin 2019, Limaj ka deklaruar se e posedon një veturë të markës “BMW” në vlerë prej 10 mijë euro, derisa gjatë viteve 2010-2012 ka deklaruar se i posedon dy vetura në vlerë prej 45 mijë euro. Ndërkaq në vitet 2013-16, ka deklaruar se e posedon një veturë në vlerë prej 30 mijë euro.