admin

Vetëm gjatë vitit 2023 Kosova ka importuar energji elektrike në vlerë prej rreth 116 milionë euro, raporton Front Online.

Importi është bërë nga gjashtë shtete të ndryshme në botë.

Madje edhe nga disa shtete, që nuk e njohin fare Kosovën si shtet.

Agjencia e Statistikave të Kosovës në një përgjigje për Front Online kanë treguar se Kosova ka blerë energji edhe nga Spanja e Serbia, në vlerën 89 mijë e 223 euro.

Përndryshe, ambasadori i Kosovës në Kroaci, Martin Berishaj, ka qenë në shënjestër të raportimeve mediale në Kosovë dhe Slloveni si përfaqësues i kompanisë sllovene GEN, dega në Beograd,  nga e cila Kosova kishte importuar energji elektrike. Madje për këtë çështje është themeluar edhe një Komision Hetimor Parlamentar, ku opozita e ka fajësuar Qeverinë “Kurti” në lidhje me importin e energjisë elektrike nëpërmjet ambasadorit Berishaj.

Sipas statistikave, Kosova më 2023 më së shumti ka importuar nga Maqedonia e Veriut, e që kap vlerën mbi 49 milionë e 200 mijë euro.

Kosova ka blerë energji mbi 35 milionë e 900 mijë euro edhe në Shqipëri.

Mbi 17 milionë kemi importuar energji elektrike nga Sllovenia, e po ashtu nga Danimarka rreth 7.5 milionë Euro.

Në lidhje me importet e energjisë elektrike, Front Online i ka dërguar pyetje edhe KEDS-it dhe KOSTT-it, por këta të fundit nuk janë përgjigjur në pyetjet e dërguara.

Deputeti Shala për energjinë: Qeveria e ka prioritet importin për shkak të të mirave materiale që po u sjell grupeve të interesit

Për importin e energjisë elektrike, ekonomisti, njëkohësisht deputeti, Ferat Shala fajëson Qeverinë që sipas tij, nuk ka bërë asnjë strategji.

Ai për Front Online ka thënë se Qeveria e ka prioritet importin, për shkak siç thotë ai të përfitimeve nga grupe të caktuara.

“Defekti zyrtar është që ka dështuar në rritjen e kapaciteteve prodhuese energjetike dhe domosdoshmërish kjo ka favorizuar linjën e importit, linjë e cila për ne ka qenë e dyshuar dhe ne i kemi ngritur dyshimet tona edhe deri tek Komisionet Hetimore Parlamentare. Në parim Qeveria përveç hapjeve të disa ofertave që tashmë janë të dështuara nuk kemi parë ndonjë lëvizje të madhe dhe në esencë çështja e energjisë prioritet është importi sepse iu ka sjell të mira materiale grupeve të interesit të energjetikës që janë shumë të afërta apo në pjesën piramidale të pushtetit”, u shpreh ai për Front Online.

Madje ai thotë që nëse vazhdohet me strategjitë e tanishme, importi në vitet e ardhshme do të rritet.

“Me këtë planifikim, dhe me këtë strategji se si qeveria i ka hartuar dhe po i ndjek definitivisht po”, u shpreh ai.

Eksperti i energjisë: S’kemi me arrit me plotësu konsumin, është rezultat i gabimeve të mëhershme

Njëjtë thotë edhe eksperti i energjisë, Admir Shala.

Ai në një prononcim për Front Online ka thënë se Kosova mundet me i plotësu nevojat me energji vetëm nëse ulet numri i banorëve.

Përndryshe, sipas tij, do të ketë mungesë për shkak të gabimeve që janë bërë më parë.

“Çdo vit e më shumë ka me u rrit nevoja për me u konsumu vetëm nëse ulet numri i banorëve që janë duke u larguar prej Kosova ka me u ulë konsumi përndryshe s’kemi me arrit me i plotësu vet nevojat tona e që është rezultat i gabimeve të mëhershme”, u shpreh ai.

Shala thotë që nuk do ketë as investitor, e si rrjedhojë as zhvillim ekonomik nëse vazhdohet me këtë ritëm.

“Nëse vazhdojmë me këtë ritëm patjetër që konsumi do të rritet, por po e shoh që ka ulje të popullatës andaj konsumi mbetet i njëjtë, mirëpo s’ka me pas zhvillim ekonomik sepse me këtë import të energjisë elektrike, me këto shpenzime, me këto rritje të çmimeve atëherë edhe investitorët kane me pritu me ardh në Kosovë, aktiviteti ekonomik ka me qenë shumë më i ulët”, ka thënë ai për Front Online.

Eksperti i Energjisë: Strategjia për Energjinë është gabim, të ndryshohet sa më herët

Eksperti i Energjisë, Admir Shala thotë që strategjia për energjinë është gabim.

Ai madje thotë që sa më herët të ndryshojë, aq më mirë për Kosovën.

“Strategjia që e kanë aprovuar në vitin e kaluar është gabim. Strategjia e energjisë është gabim nuk e ka godit tamam në treg kur është dashur me e godit, mirëpo kështu ka vendosur Parlamenti i Kosovës, unë mendoj që është gabim ajo strategji, jo krejt, një pjesë është e mirë dhe duhet me korrigju aq ma herët, aq më mirë”, u shpreh ai për Front Online.

Kuvendi i Kosovës ka miratuar Strategjinë për Energji 2022-2031 në mars të 2023.

Sipas kësaj, Kosova synon që deri në vitin 2031 të arrijë që 35 për qind të nevojave për energji, t’i gjenerojë nga energjia e ripërtërishme./Front Online/